𠊎在加護病房I C U 蓮花化身撿轉一條老命。
因爭在20零年前𠊎識肚屎痛開刀過，佢係盲腸噼biag忒產生腹膜炎，正經過手術在肚屎皮項挖孔畀引流，在醫院歇忒14日過後就留下後遺症哩。故所吾个細腸當敏感，消化系統就當差吔，寡寡一食著較壞消化个糯米食物，就輒輒半夜仔飽氣肚屎脹脹，常時會透夜溫痛溫痛歸暗晡喲!
這種症頭講來乜盡鬥搭寡寡半夜痛，痛著慶痼goˊ瘼moˊ兼趜giug屎，只愛等妳第二日遽遽去診所胃腸科掛號畀醫生看一下，儘qinˋ採食兜胃藥伊就會好吔哩。故所幾下十年下來痛著有經驗過後，連𠊎自家乜變作對病痛嶄zamˋ蠻蠻皮忒哩，恅著伊係正經胃病作怪!只要食兜幫助消化个胃藥仔，伊自然就會好哩喲!
吂知恁久自吾姆過身後自家日夜操煩，飲食方面煞等無正常，消化系統就越來越壞fai 蹄taiˇ哩ieˊ，最近有時節一緊張，半夜仔肚屎就痛到佇du毋著會激激惇，甚至連食胃藥，在肚屎皮搽薄荷油本本還係共樣恁痛，就親像靴背爪癢一樣，包尾無奈何緊拖緊看緊毋潛勢，到4/16半夜就喊119載去『聖保祿』掛急診，一檢察正知腸仔佢兜相黏!該日又恁堵好醫院無病床愛仰葛gadˋ煞sadˋ呢?只好在急診室宕忒觀察二日後，嗄引起敗血症休克肺部積水，經過聖保祿腸胃外科吾倈仔同學《黃醫師》緊急開出紅單病危通知黏時喊愛家屬簽同意書隨時開刀〈伊兜馬上嘴肚插管、用葉克膜呼吸，兼在頸筋大動脈注入抗生素、營養射、打高蛋白、打血漿維持體力〉，一送〈ICU〉加護病房一歇就八日，等麻醉清醒後看護理師換藥仔，正知自家肚屎皮傷口花喇必駁縫忒23針，還在肚屎皮項挖孔帶一條管仔引流血水，再看該恁長个疤心情實在還慍悴，自從毋識愐過自家肚屎皮項會有恁大个疤，看著實在心裡還會起雞嫲皮哩!該種感覺就親像啞狗食著黃蓮一樣樣有苦難言。
拔管後𠊎就摎吾老公講啊：『𠊎可能再無法度陪伊去泅水泡溫泉哩喲，在熱天著个靚靚个比基尼哩喲!』。吾老公一聽嗄微微仔笑摎𠊎打嘴鼓應講：『妳愛較曉愐開兜喲，這擺喲伊差一息畀𠊎嚇死!伊看著𠊎在加護病房〈ICU〉八日畀人五花大綁，滿身插等管，又透尿管又注血漿抗生素、靠葉克膜呼吸，屎sii胐vudˋ項還包尿帕仔、頸筋大動脈還注營養射，完全靠打高蛋白維持生命，這下身體能康復既經盡佳在哩，伊還講啊：『餔娘姊能撿轉一條命，對伊來講，伊既經盡感謝『菩薩』保庇哩喲!
其他伊對吾外表靚奀zeˋ勸𠊎講：『就莫搭佢去好哩啦!』，再講：『人生還係康健最重要哩!』。𠊎一聽吾『老貨仔』老公恁仔講：『心肚測著乜有道理喲，一旦人發病仔實在還清苦連一口細痰都愛人抽，無尊嚴以外又無自由，希望病情能控制穩定好，遽遽出院轉屋下慢慢調養就盡萬幸哩哪。
目前雖然𠊎講話還有兜迪迪凸凸會哮he龜喘，喉嗹梗插管个地方還會痛，講話還聲濕濕哩，毋過吾看吾屋下人連心臼都恁賢孝，日日就無停跎，恁煞猛煮香馞馞个米湯料理，攪水果汁將流質食物送到吾病房來分𠊎食，還日日輕聲細語交待喊𠊎：『愛少量多餐兼多保重!』，還講：『媽媽愛多多加油!加油喲!』。
一屋下人通棚認為講：『天有不測風雲，人有旦夕禍福』何必忒在意外表靚媸zeˋ〈醜〉呢?還係康健最重要啦!!勸化𠊎：『對肚屎疤就莫搭佢去好哩哪!今後有病一定愛到大醫院詳細檢查，莫再亂尋細診所亂食藥哩喲!!』；講𠊎親像《封神榜》肚裡个哪吒畀師父太乙真人，借蓮花蓮藕幫哪吒做圓身，使哪吒還魂再世，啊𠊎呢還好運係借醫學發達救一條命!故所勸𠊎：『愛好好愛惜身體，莫再過勞吔，以後愛好好享福哩啦』!
摎大家分享𠊎歇院21日病情，兼心情轉換故事分享!
同時盡感謝盡多關心𠊎个親戚朋友，祝福伊兜身體康健：
╭╮☆╭╧╮╭╧╮╭╧╮╭╧╮╭╮☆
╰百╮║莊│║嚴│║萬│║善│╰圓╮
☆╰福╘∞╛╘∞╛╘∞╛╘∞╛☆╰極☆
留言列表
