【請大家來聽『李文古』為《二河討妾》笑科古事!】 @ jane3765529的部落格

【話講】頭擺有隻『李文古』伊盡會搞笑係隻鬼靈精腦筋盡好，佢有隻阿叔安作『李二河』身下無降一男半女，厥叔心肚盡想討隻妾來為伊傳宗接代，毋過驚厥餔娘姐仔食醋毋肯答應，就走去拜託『李文古』幫忙。
『李文古』一聽就滿口答應『好!』，還請厥叔假裝出門去收租，當厥叔一出門後，伊黏時就拿一支尺故意到厥叔屋下，在人客廳項左量右量，厥叔姆測著盡奇怪就問李文古講：「你發癲哩喺？仰在吾屋下左量右量吓？」該『李文古』面項笑嘻嘻講：「阿叔姆啊!伊奈有發癲，伊斯愐著厥叔恁老吔，身下又無降倈仔，萬一出門有三長兩短愛仰葛煞哪!伊愐著厥叔恁大隻个產業，將來全部都會歸伊管理，故所伊遽遽先來丈量，免得將來財產愛整修抑轉手賣，正知幾多啊？」。
厥叔姆聽著斯心肚還譴哩喲，等『李文古』一走，黏時就喊媒人來，托伊物色一隻細妹仔摎李二河娶妾。無幾久厥叔轉來後，厥叔姆就將『李文古』个話同伊講，還摎自家喊媒人物色為老公討妾个事講一遍，厥叔聽著心肚斯暢著會死吔喲，遽遽去感謝『李文古』完成厥心願。
第二年李二河个妾斷真就降著一隻細倈仔，當滿月請人客該日，『李文古』乜來摎伊兜祝賀。厥叔姆就盡得意摎李文古講：「李文古啊!若叔這下斯降有一隻倈仔吔喲，看你還敢毋敢再來屋下丈量麼啊？」李文古一聽嗄笑出來講著：「阿叔姆!你有一隻恁得人惜个倈仔，應該愛感謝伊正著啊！哪毋係伊假裝丈量屋下，阿叔姆仰肯畀厥叔討妾吓？」。厥叔姆聽著正知自家中著『李文古』个計調，面項嗄緊笑緊罵自家仰會恁『戇猴』哩，畀人賣食忒吔伊還毋知哩喲!!。
摎大家分享『笑科古事』!

祝福大家
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆(¯`*•.¸ . .圓滿人生五子登科. ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸. 享受人生五福臨門 ★.¸.•´`☆