jane3765529的部落格

記得該年阿爸教ngaiˇ騎自轉車，ngaiˇ既經係八歲讀小學二年生哩，因爭讀書來回愛行一點鐘去圓潭仔國小讀書，常透就欣羨同學騎自轉車上下課，看到伊兜還奢鼻喲!

心肝肚真想跈tenˇ伊兜乜騎一台自轉車上課，故所放學轉去腳痛，就日日大嫲牯聲噭gieu眵ziiˊ〈哭〉，蹻kieuˇ〈煩〉阿爸頷ngamˋ頭〈點頭〉買ㄧ台自轉車分ngaiˇ騎。阿爸總係緊抓zauˋ厥頭那，嘴項緊呻cenˊ〈哀〉伊無錢啦。該常節ngaiˇ个思想當單純斷真係毋知頭天个摝屎棍，包尾吾爸佇du毋著diauˇ〈受不了〉妹仔日日蹻kieuˇ啊蹻kieuˇ跳啊跳吔，伊總係毋盼得妹仔哪，就高不將載ngaiˇ去旗山買ㄧ台24號仔細自轉車轉來分ngaiˇ騎哩!

無想到細自轉車遷轉屋下後，又毋曉騎愛仰葛煞呢?吾爸總係利用透當晝無睡目，伊在後背扳banˊ〈扶〉等教妹仔仰吔騎自轉車，大約有歸禮拜喲!都在草坪項橫vang〈跌〉到頭烏面烏，又搭dapˋ無聽話興hin都du都 du 仔〈興緻勃勃〉興騎盡遽，輒輒就反應來毋得掣cadˋ擋車，寡寡就撞著自轉車落lod鏈〈脫鏈〉敢gamˊ〈逼〉吾爸修理喲。

過後這件事分吾大阿哥發現著，嗄畀罵到臭頭，伊講啊：『屋下田坵事耕種芎蕉收成恁大多，毋買一台三輪車來ten手載貨，嗄顛倒買一台細腳踏車分細妹仔讀書』!!伊心肝肚氣憤憤仔還譴哩喲，還將吾細腳踏車擲deb到輪框仔壞爛擐kuan〈輪框炸爛〉，害阿爸心肚還難過著想食農藥死忒，ㄧ屋下人冤家羅債〈吵鬧不休〉。雖然阿爸您既經過身20零年吔，毋過吾還盡難過這件事情哩，原來做細妹仔人斯愛學習順從个! 

雖然阿爸您既經去做仙哩，愛真還係請您原諒若妹仔嬌眵拗蠻啦!!因爭吾个毋知漦濞，寡寡害您為難，這下若妹仔乜既經長大吔，曉得料理家庭幫忙照顧阿姆哩喲，故所請阿爸放心，原諒若軟弱恁嬌尸啦!。

在這祝福阿爸老人家，在極樂世界消遙自在，萬事如意!。

摎大家分享!!

祝福大家 ：

•♥♥•。¸✽¸✽..✽¸。•♥♥•。
¸╭╮☆╭╧╮╭╧╮╭╧╮╭╧╮╭╮☆
╰平╮║幸│║福│║快│║樂│╰健╮
☆╰安╘∞╛╘∞╛╘∞╛╘∞╛☆╰康

•♥♥•。¸✽¸✽..✽¸。•♥♥•。