jane3765529的部落格

這駁仔日仔過著實在還艱辛，輒常圓身就凌 linˊ凌親企毋穩。

發作時間無時無節一下哩頭那就起暈吔，行路親像地泥無打底一樣浮poˇ浮poˇ冇pang冇pang，尤其右片析个頸筋又緪繃繃哩，血壓一下高一下低，〈收縮壓110~150毫米﹐舒張壓乜係70~90毫米〉﹐三日兩日就愛去大醫院吊大射掛急診，治療該驚人个凌 linˊ親症頭摎頭那虛暈。在醫院通膨一抹煞詳細做過『屙尿抽血檢查』、『電光檢查』同該『頭那超音波斷層掃描』、『頸筋動脈攝影』、『頭那核磁共振⋯⋯』全部做淨淨哩。

報告出來時節，先生看看仔同ngaiˇ講：『妳有高血壓、心臟病麼無？化驗報告出來吔!你看來膽固醇222mg/dl有較高一息，還發現你頸筋个血管有較細條，其他看毋出有麼个大問題！』。吾老公一聽到就遽遽問醫生：『係中風喺？仰恁奇怪呢?ngaiˇ餔娘平常時無麼病痛，總會得到這種症頭，難道伊這種無病名喺？還有麼个方法好治療麼？還有愛仰般保養摎預防？』。

伊一連串問題問先生，先生嗄緩緩仔講：『現代人大體缺少運動，歸日仔毋係用目珠看電腦打字，就係肉類食忒多，最好斯愛改變飲食習慣，摎減少心情壓力，血濁問題再食兜降高血壓藥吔，控制就會漸漸好啦！』。又還講：『目前發現這種病人同姿勢有兜關係，係屬於『循環不良症候群』个一種。用醫學學名來講係『顱底動脈症候群』完全係腦血管動脈供血不足引起个 。

阿姆哀哪仰會有恁長介病名，ngaiˇ兩公婆食吔恁大人就毋識聽過這種病名，兩公婆斯你看ngaiˇ、。ngaiˇ看你，完全就歸頭那『霧煞煞』。兩儕人高不將趕緊領著藥吔，黏時就駛車仔倒轉屋下去。一入屋下房間肚裡，ngaiˇ元氣親像失忒樣仔當鬱卒!歸圓身大力橫倒眠床肚，黏時就聽到吾八十五歲个哀仔在厥房間肚，大聲問吾个病情報告，聽到ngaiˇ這隻病名伊逐日就『懶怠taiˋ怠』仔，伊連食飯就無知味緒哩喲。親像比ngaiˇ个症頭還較嚴重一樣。

原底吾兩公婆恅著佢恁老吔哪，老人家耳聾聾又腦筋無好，一定聽毋識這種病名吂知盡睬應伊講講哩，嗄害伊比細人仔還較囉嗦哩，日日三餐一看到妹仔斟茶食藥仔，正一入嘴肚就問：『仰吔啊，有好麼？』。斷真毋知愛謔抑係愛噭，食藥仔又毋係食仙丹哩，總會黏時恁緊就好利利哪。再講阿姆該身體，自從10年前一擺浴堂洗身出來，踏出門檻橫倒過後，左腳右腳都有做過人工關節，出門行路就盡無方便，愛拿四腳架仔。加上舊年仔又五十肩痛。骨頭疏鬆症越來越嚴重吔，連等腦筋記性乜退化盡多，尤其屙屎、屙尿、洗圓身就像細人仔愛妹仔通棚摎佢ten手，成時吔膀胱忍毌歇還會暗晡頭犁尿，真裝斯還壞蹄咧呦，還無奈何哩。

自家愐著電子時代，後生人各各愛去上班賺錢無法倚勢，只好高不將在暗晡頭睡目前偷偷拜託老人家佢愛包尿帕仔，雖然佢腦筋精精有一萬隻無樂意接受包尿帕仔，到底寒天還係會忍耐一息勉強分世細仔包，抑無就係在暗晡頭食夜時節，再細聲仔摎伊分附，『喊阿姆湯湯水水減食兜，免得麻煩人家包尿帕仔』。這滿時節老公聽到問題輪到係ngaiˇ身體故障，想到一片析愛顧老人家，一片析姐仔〈妻子〉又破病愛顧，難怪歸日憂頭結面食睡毋得，佢想來想去無滑頭，歸就遽遽工廠收收項來，趕早辦60歲退休。食終身俸較贏，再逐朝晨頭陪ngaiˇ去蹶山做運動。再慢慢仔商量渡阿姆去分骨科醫生看病，詢問資格：『伊使得請外勞麼？』好不容易等到該日，輪到陳醫生看診，佢看到阿姆坐輪椅正經無法自理，就分附家屬《吾兩公婆》愛同時會診內科醫生，經過兩隻醫生打『巴氏量表』，分數通過就使得請吔。

這下屋下就請一隻細阿妹仔菲傭打理厥睡目食飯運動所有問題，雖然佢兩儕人語言無共款，靠一息『身體語言』配合比手畫腳ten手溝通斯無問題个，兩儕人還輒常有講有謔，趣妙个事情還盡多哩。就恁仰日仔無多知經過半年，自換人照顧阿姆過後，料理壓力減少，精神變化輕鬆盡多，加上有運動ngaiˇ該凌 linˊ親病症，也就漸漸沒再發作過哩，這下屋家肚裡，顛倒就輒常會聽到食飯時間，菲傭个：『阿嬷！菜盡香喔，再食一口啦！』像拐細孺个客話國語聲調仔。再斡頭詳細看阿姆該表情；手定定仔拿起厥調羹仔，盡無結煞一口一口送飯菜入厥嘴項，用厥該無牙齒个牙框糜啊糜仔，食佢自家綿綿該飯菜〈烹煮的特別伙食〉，常時節無堵好乜會有『扭扭糾糾』『番番綻綻』个抗議時節。

斷真講歲月不饒人，老人家个身體連等脾氣，漸漸吔乜完全像古時人講个：『老人三歲子咧』！ngaiˇ誠心祈求神明保庇；吾姆能健康分ngaiˇ兜世細一直賢孝，像佢頭擺照顧ngaiˇ兜細孲仔常節，日日摎佢講：『親愛个老阿姆，ngaiˇ真裝蓋愛您哩！』。吾个樂線个老阿姆佢一聽著這兜話，斯像三歲子暢到笑到『嘿嘿滾！』一屋家人暢暢享受天倫之樂。摎大家分享。

祝福大家
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆(¯`*•.¸ . .祝福您好心情 幸運相隨. . ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸.天天 開心 快樂 幸福 健康 ★.¸.•´`☆

註釋：正常血壓 收縮壓<120 舒張壓<80
一般正常个膽固醇 參考值約110~ 200m g/dl