伯公廟
《文學客家第五期》
細細个『伯公廟』係客家莊頭最多，畀老百姓信仰服祀最多个地方神明。佢个特色係上面牌匾掛等紅色个大紅色布條，刻有『福德正神』字蹟，分人盡親切个感覺。『伯公』个由來，係因爭老百姓个感恩之情，頭擺人耕種無科學知識，見堵著無辦法解決个事情，親像尋人尋失物(錢銀、金飾、車仔…)尋頭生仔〈牛、羊、豬、鴨、…〉全部就會走去拜託土地伯公幫忙。連屋下老人家圓身無鬆爽，細人仔好噭難畜反躁夜裡毋睡…總會先同『伯公』拈籤卜卦憑筊仔問吉凶，土地伯公人盡好，馬上會黏時指示失主尋著東西，又搭同破病人醫病同細人仔收驚。故所逐年農曆二月二係『伯公生』，該日紙炮爆天鬧熱煎煎做戲謝神明，滿奈人就會來這唱喏iaˊ食『伯公福』求食平安，還會帶衫褲來求健康、求家庭圓滿事業順利，歸庄頭人相爭比背渡自家屋家个細人仔，來分『伯公』做契子。
愐著頭擺人實在還單純又無麼介娛樂，吾阿爸同阿姆就盡愛渡ngaiˇ兜，細人仔去伯公下尞，伯公下有頭大榕樹歸庄項盡多人在該尞涼打嘴鼓，ngaiˇ兜細妹仔就寡寡盡愛拈榕樹籽做鈸鍊，同隔壁鄰舍个細人仔，在榕樹影下石板頂高搞家啦飯仔，吾阿爸斯最好講古个人，吾細阿哥就好蹶樹，吾阿姆伊好唱客家山歌，在該央時節也就係最高等个娛樂哩喲。
伯公雖然無用金身鑄，淨用簡單个大石牯立碑分人祭拜，毋過伊嗄聚滿淰淰个人情味，還有醹neuˇ醹neuˇ〈濃濃〉个人民信仰。今下農業社會轉型到電子時代哩，大家經濟越來越好額，知識水準衛生通膨生活提高盡多，社會程現一片多元文化性，鄉下人全部歇大屋食自來水、設備有馬桶化糞池日光燈馬路照明。連『伯公廟』造型外背也變到雕龍畫鳳，建築空間變闊吔華麗又舒爽。原本个大石牯土地伯公變做有鬍鬚長長，手怙拐杖仔滿面安祥笑容，已經打扮人化咧呦！大家可能係受教育影響一擺吾就問吾姆：『到底係伯公分人个感恩信仰較多呢？也係神話古事流傳較多影響人信仰服祀呢？』阿姆一下聽到黏時笑呵呵講：『戇妹仔！有恁好个伯公神明摎大家保庇平安，還有神話故事教化人心，分大自家無人敢做壞，會驚分神明伯公顯靈用拐杖仔打屎胐，厥故事陪伴大家長大係一隻盡美好个回憶啊！』。阿姆講个斷真有影吔，伯公厥个故事人人愛聽，故事流傳全台灣各各族群，不但親切愛民還有厥有靈有信盡得人懷念哩。
故所厥香火正會越拜越旺，『伯公廟』建築形成臺灣建築傳奇，現代人个家庭休閒多，大家還係慣係去伯公下唱喏iaˊ，同伯公講心肚話在榕樹下尞涼，雖然伯公廟厥所在既經變闊變靚吔，伯公下伊還係大家最愛去聯誼打嘴鼓个好所在，毋信哪您今暗晡食飽夜過後，邀一屋下老嫩大細定定仔散步到伯公下泡茶，欣賞伯公下榕樹頂个月華，再講一隻『土地伯公』个經典古事分細人仔聽，保證這種休閒享受係：「千金難買」个幸福哩。
摎大家分享。祝福大家
。★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆(¯`*•.¸ . .好心情 幸運相隨. . ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸. 開心 快樂 幸福 健康 ★.¸.•´`☆
留言列表
