客家粄圓
文章刊登文學客家第3期〈四縣腔〉
用手工純糯米挼个客家粄圓，有兜人安伊做「雪圓仔」，伊有紅有白外形生著一細粒一細粒盡得人惜。
比將在農業社會大家庭人口多，食量準備愛當多時節，就輒常會歸屋下人喊來大出動，大人細子圍共下打粄圓，煞猛用雙手掌用全心意，挼到當勻當靚，做好了後拿入灶下，用大鑊滾水熝粄圓。熝好个粄圓，放入清清个甜湯肚，鼻著老薑嫲个味緒，香香甜甜盡餳人食，食起來QQ彈牙，心肝也異燒暖哩。
這種食法係頭擺客家庄肚傳統美食食法，佢代表客家人个熱情誠心。頭擺常⋯⋯透看吔著隔壁鄰舍，無論蒔田割禾、收冬做戲，做盡愛挼粄圓。比論做好事訂婚結婚、討心臼嫁妹仔、老人家做生日、過年過節、婦人家降子滿月做對歲、掛紙拜阿公婆、起屋完工、唱喏祈求國泰平安、風調雨順萬事圓滿，樣樣定著就愛來挼粄圓。
尤其堵到十年一擺廟項个大打醮，絕對定著免不了越至愛挼粄圓打鬥敘。該時節挼粄圓就越至澎湃多元化囉，伊有紅有白，有大有細、有甜有鹹〈放肉〉食法變化多元。愛渾有渾、愛齋有齋。
客家庄頭鬧熱煎煎，場面人山人海，乜有歕八音做大戲，『謝神還願』打紙炮仔唱山歌，透日鑼鼓碰天無輸該過年景象哩喲。
客家粄圓象徵客家人个團結精神，不管時代仰般型轉化道電子時代，用機器取代手工个粄圓吃法儘多，大家人還係較愛食傳統手工挼个粄圓，問佢兜客家人『做麼較愛食傳統手工挼个粄圓呢？』伊兜總係講：『測到口感爭差，缺少氣氛啦!』。故所這下人還盡懷舊，儘時行招待人客時節，大家再來比一下手路挼粄圓比賽，一儕二儕三儕四儕五儕……圍共下挼粄圓，大家歡喜”謔”天，客家人該熱情，大家無分老嫩開容笑面氣氛充滿歸個會場。
還好哦這種快樂恁純樸恁自然恁真情流露，人情味淰淰係有錢難買个，乜就係講機器永遠無法取代伊該所在哩！ 摎大家分享。
祝福大家
☆☆ (_¸.♥(_¸.♥´´ ¯¯¯¯¯¯¯¯ღ☆ღ¯¯¯¯¯¯¯¯¯ `´♥.¸_◆
(¯`*•.¸ . .好心情 幸運相隨. . ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸.日日 開心 快樂 幸福 健康 ★.¸.•´`☆
留言列表
