jane3765529的部落格

看著吾姆个醹neuˇ醹neuˇ鄕愁                       

自吾姆腦筋退化後，盡久就無看著佢食東西，有恁好个嘴斗〈好胃口〉哩!

吾老妹緊喊：『媽~燒喔燒喔，愛定定仔〈慢慢的〉定定仔食喔!』

阿姆伊親像無聽著厥妹仔个愁慮，共樣頭磬qinˋ磬仔用筷仔連夾至夾，厥碗項个粽仔食，伊連面都無探damˊ〈抬〉起來，聲頦嗄聲失失仔〈激動沙啞〉講：『盡好食~盡好食哩!』測著厥心情還暢哩喲!

吾心肚愐著伊跈ngaiˇ歇桃園歸十年，日日局在大樓頂，罕識畀出門去打嘴鼓還衰過哩喲!又搭dapˋ〈而且〉吾還毋識在屋下停腳比beˇ伊，同裹過故鄉个粽仔畀食，全係因爭自家對『辦節慶摎煮食』手藝忒濫漦〈差勁〉吔啦。這擺正會分老妹提議佢款料頭來吾屋下《裹粽仔》分阿姆食。佢用糥米包番豆麩摎菣到香馞馞个料頭，再用竹葉密密裹等，放在煙咚咚燒熝熝个鑊仔肚畀定定仔煠。

煠粽仔个燒氣沖著歸屋間香噴噴，這係阿姆細細鼻慣个味緒。乜係吾兜細細食慣个味緒，講乜奇怪味緒親像會變奇術〈變魔術〉一樣，摎吾姆个記才〈記性〉一下喊醒起來樣吔，看伊斯對食又回復精神哩，腦筋反應摎弄擺〈頭擺〉共樣好吔， 分吾心肝感動著目汁緊跌下來哩!

摎大家分享。.

祝福大家

★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆(¯`*•.¸ . 幸運相隨. . ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸.日日 開心 快樂 幸福 健康 ★.¸.•´`☆