客家優良婦女
四縣腔〉※發表在新竹市第三屆徵文新竹風情
常透會聽著人講：『討心臼愛討客家細妺仔，來做心臼最好！』。
意思係講伊兜盡欣賞客家細妹仔，理家煮食又乖巧个意思。在吾个心肝肚就感覺到做客家細妺仔盡沙鼻，恁得人惜哩。在歷史紀載，客家民族係靠丘陵耕田絡食个族群，習慣大早天朦光就出門作事，開墾耕種蓄飽一家人个生活，伊兜民族性盡強：篤實、堅忍、勤儉、團結，尤其客家細妹仔從細就盡會ten手屋下耕種、蒔田、ve 秧仔、割禾、挲草，aiˊ擔，連畜頭牲掌牛、羊、豬、雞、鴨…等等，寡寡盡慶又賢孝。
伊兜對煮食乜異熟酪，日日斯灶頭灶尾，鑊頭鑊尾、屋前屋背，田頭田尾都恁慶做。故所客家細妺仔無纏腳有『天足』个講法，會耕田做事確實係屋下人个好幫手。還有更加沙鼻个就係，客家婦女創作出來个手路菜乜盡好食，乜係盡畀人尋味个，有擂茶、炒米粉、粄條、菜包、覆菜乾、粢粑仔、發粄、粄圓、四炆四炒，在客家庄一定大家就看得著這兜美食，除了鼻起來有香馞馞味緖，乜盡扯飯，盡受觀光客遶尞客个認同。
還有人稱講：『成功个男人後背，一定有一隻偉大个女性』係表揚女性个話。在舊時代社會裡肚，ngaiˇ黏時愐著李喬教授个著作《寒夜三部曲》，燈妹女士經歷人生个盡多打擊，但係環境並無將佢打横，顛倒堵著事情个考驗，越至分佢越堅強，充分展現客家婦女『刻苦耐勞』个韌性精神，係相當純樸寫實个作品。這下跈等時代進步社會經濟改進哩，客家女性乜跈等進步，在民主國家受教育機會提高，男女平等哩!社會出現上班婦女，女性上班族受到大企業重視。完全係女性形象好；有耐心又溫柔、做事認真、講話圓滿毋會得失人个好脾氣，故所盡受大企業歡迎。像在客家電視台播出个《十里桂花香》，女主角客家妹賴盆妹女仕，佢就係盡好个客家優良婦女，佢做人無派頭係『鼎泰豐』个頭家娘，伊將鼎泰豐美食用網路購物，打出海外市場名聲成功創業。
還有像客委委員會葉菊蘭女仕，還有盡多喊毋出來个傑出女性；有客家細妹仔校長、醫生、電視台主播、學校个先生、國家聲樂家、大學教授、國際有名个服裝設計師，電視主持人，只是佢兜恬恬吔無愛講煞猛做事定吔。故所；在科技快速變化个環境中，客家婦女角色增加吔，除了上班賺錢、還愛照顧爺哀實在無恁該唷，但是篤實个客家婦女，寡寡克服萬難圓滿做到吔，實在還“慶”哦。更難得還分總統認同；頒發『模範母親』。證明客家婦女，對國家貢獻家庭圓滿社會安定係盡受人欣賞个哩。
摎大家分享。
祝福大家
☆¸..¸★☆´`• 開心 快樂 ★.¸.•´`☆•°*°•.¸
★.¸.•´`☆•°*°•.¸幸福 健康 ★.¸.•´`☆•°*°•.¸
留言列表
