ngaiˇ出生在高雄縣旗山鎮『埔姜林』客家莊肚，吾姆係美濃人。故所ngaiˇ兜一屋都係純正个客家人。從細接觸介老人細子、摎搞伴吔摎讀書同學全講『客家話』過多、同講『河洛話』攞幾隻同學講一息『原住民話』，在自然生活環境肚裡，不知不覺訓練ngaiˇ盡會講這兜語言能力，頭擺ngaiˇ一直毋知語言能力好伊好處恁多，原來伊兜係陪ngaiˇ人際交流一生用毋忒个财產哩!
到高中畢業出外食頭路第一擺接著，ngaiˇ臨將會七十歲个爺仔來信用「客語漢文」寫書信仔時節，心肝肚第一次出現愐想原來吾爸「漢文」基礎恁深！信內容寡寡寫：【講屋下平安愛ngaiˇ放心，摎交代人情事理一概詳細叮嚀，細妹仔出外食頭路愛細義安全，愛煞猛用心做頭路正會得人惜等……等】盡簡單幾隻!
ngaiˇ介仰時節高中畢業正18歲定，初初擺食頭路當然會盡想屋下个一切，逐擺都會等望收到屋下人个來信。故所這乜係ngaiˇ盡沙鼻，感謝有同吾爸「客語漢文」學習書寫機會哩。坦白講有時節ngaiˇ乜識懷疑自家，中文程度乜無比吾爸差啊！在學校讀書讀十過零年，居然無辦法一氣擺讀出吾爸个「漢文」書信，測著自家仰會恁痼goˊ瘼moˊ哩，一定愛使用姆語讀正使得。
難怪分吾爸緊怨嘆【伊一手大細斯讀書讀著連自家『客家漢字』，都無辦法讀、無辦法寫，實在還屙屙baˇ料哩!】。這件事一直係分ngaiˇ最難忘个回憶。承蒙吾爸有分ngaiˇ恁好个機會接觸摎教育。伊一直用「客語漢文」書信摎ngaiˇ聯絡教導，分ngaiˇ一生人對「客語漢文」有特別个感情 。
經過17年後吾爸84歲既經過身哩，ngaiˇ早已經嫁到桃園生活，30零年一直上班無機會講客家話。一直到民國97年在網路上看到，『客家委員會』招考舉辦客語能力認證，分ngaiˇ心肝肚愐想，自家這下使得用四縣『客家話』來驗證漢文成果哩喲！先下就去先報考『客語能力初級認證』，結果順利98分。通過客語能力初級認證考試，取著初級證書分吾心肚盡暢咧，過後緊上班吂知自家就又懶頭忒咧。一直等到98年去『空中大學』讀書，預算完成頭擺个大學學歷。當中因爭課業無閒，又愛兼照顧吾姆个痴呆症，在報考『客語中高級認證』時節分心表現失常得到214.5分定，吾老公嗄用數學『四捨五入法』講笑科安慰ngaiˇ講『妳該客語姆語高級認證乜過關』啦!。
過後99年自家毋甘願『客語高級姆語無級格』硬頸起來哩喲，就在朋友邵介報名參加區域代表『桃園縣觀音鄉，樹林國小』、社會組客語朗讀南四縣腔朗讀比賽，當時『范姜運榮』校長評審，該日參加鄉親先生高手如雲，ngaiˇ得到第四名優良成績。接等【臺灣客家筆會】成立，ngaiˇ開始寫客語文章投稿；有；散文『客家粄圓』、『伯公廟』、『煞猛讀書正有好前途』、『吾嬷个嫁粧-棺材』，『老人三歲子』刊出。同時又對『新竹市第三屆客家兒童文學』投稿，寫華客翻譯；像伊索寓言个『一飯千金』，摎《李家同》校長个著作【不能讓窮孩子落入永遠的貧困】翻譯。其中散文：【客家優良婦女】、【三歲倈仔打潑賴】，都有得到新竹市99年度國民中小學本土教育文學徵稿佳作獎。這兜得獎肯定分ngaiˇ目汁闌干，盡感謝當年教ngaiˇ个阿爸，同當多教過ngaiˇ个先生摎『行政院客家委員會』个用心推動，分吾這兜客家人再迴轉對自家本土教育个重視，像ngaiˇ對吾爸个懷念出發，摎鼓勵動力目標。真裝證明ngaiˇ係客家庄長大个，係一隻標準【能讀、能講、能聽、能寫】無屙屙baˇ料哩个客家人哩。不知不覺ngaiˇ今年100.1/7已經放榜『客語中高級認證』成功通過咧。正式成為一隻『客家文學薪傳師』哩喲！
這滿從本身做起、鼓勵自家煞猛充實文學內才，來提高本土客家姆語寫作水準，翻譯【好文章】分下一代子孫看，像蒔田ve 秧薪傳客家文學「種子」繼續老祖先个心願，莫分ngaiˇ兜『客家優良姆語』斷層消失，同時畀ngaiˇ人生過到更精彩更有意義咧。
摎大家分享
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆(¯`*•.¸ . .祝福大家 幸運相隨. . ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸.日日 開心 快樂 幸福 健康¸.•*
留言列表
