吾阿嬤个嫁妝棺材
(四縣腔)※文章刊登在文學客家第六期
話講「客家人个食雜，無油臊就會食毋落飯」這係嗯客家老輩人輒常講个一句話。講到吾阿公摎阿嬷食雜就係恁樣个癖性，嗄分吾阿姆煮食帶來異多个麻煩摎開銷。
講起吾阿爸無兄弟係單丁子，故所吾阿姆个任務儘重。歸日仔愛無閒淬杈做事團草結，加上一屋家大小多還愛轆細人仔洗衫，成時節連煮食就難免赴食毋掣。堵到無菜時節就寡寡番薯籤準飯食，吾阿公摎阿嬷就會心情盡鬱悴〈vudˋ zudˋ〉，無慣係食雜恁無油臊。好得鄉下有幾隻販仔會半晝邊仔來，肩頭垓等豬紅湯、面帕粄、新丁粄大聲喊賣，吾阿姆聽著就會遽遽撿錢買一兩碗豬紅湯，分阿公阿嬷食，伊完全無愐到自家个ㄧ手細人仔乜盡豺，緊跈著看。這群細婭仔斯看到販仔頭家娘掀開鑊蓋，黏時一陣陣燒熝熝个濛煙走出來，又鼻孔鼻到香馥馥个湯頭味緒，目珠旋風變作大大蕊，看到吾阿公阿嬷兩儕人唚一口湯，正吃一細垤豬紅嘴角摸摸啊咧，還合意滿足樣仔，餳到一群細婭仔大腦強強會失控吔，口涎水吞都吞毋掣哩。吾阿公摎阿嬷看到斯還無結煞就會大聲喊阿姆：「阿菊ㄟ！加買加幾碗豬紅湯分細婭仔食。」等到大家食著豬紅湯該央時，乜學吾阿公阿嬷唚一口湯，嘴角摸摸啊咧感覺著自家還幸福喔!
實在講；吾阿公摎阿嬷个身體斷真當砸磳，佢兜無像佢等同年个老輩人腰拑背吊「背鑊」，正有ㄧ息耳背背仔，講話腦筋斯還異精靈，顛倒外型吾阿公摎阿嬷，一个斯文一个幼秀，兩儕目水當好儘登對，還有兩儕面項輒常就笑瞇瞇吔，開容笑面。Ngaiˇ到這下還盡難忘佢兜个著衫打扮：吾阿公輒輒額頭項一年透天包等一條藍布巾，身上著等棉質藍衫，褲著ㄧ條闊闊个長褲頭，腰帶仔纏條藍色長腰帶。吾阿嬷就乜身著一領大衿衫，頭戴一頂盡靚个繡花帽，自家還細無知漦屎識問過佢兜：「阿公您仰愛戴帽仔、纏頭巾」？佢兜回答：「客家人个著衣裳風俗啊！」有一擺ngaiˇㄧ隻人分吾阿爸交代到，渡阿公去店仔剃頭，看著吾阿公剃好頭那後，手對褲帶仔肚namˇ錢，打開厥腰帶仔盡長盡長，內肚放等舊舊个銀票，摺〈zabˋ〉啊拶拶〈zad〉並銀角仔一抹煞全部放在裡肚，佢講這條係厥『乾坤袋』，纏在腰項輕便又搭安全，斯畀人看著還欽羨吾阿公哩喲。
吾阿爸輒輒講這隻故事：『講吾兜祖先係梅縣人，阿公頭擺吂討餔娘時，歇屏東高樹山峎頂，係盡衰過个開墾耕田人，耕作無好收成時輒常無米落鑊，單身哥仔一儕人歇在土茅屋盡窮苦!無奈何正跈等遠房親戚搬到旗山平洋地開墾，等討餔娘姐了後，兩儕煞猛耕田畜大豬，兩公婆勞勞碌碌省儉、兩甲地一钁頭一钁頭開墾打拼到手爬腳蹶、一綱豬子一綱豬子蓄大去賣錢，正有今晡日个好日仔』。還有印象中儘難忘个一件事，係細婭仔時節無玩具，寡寡盡好在禾埕項搞掩目柄囥人尋把戲，一群細人仔全毋知漦濞，輒輒就橫衝直撞走上走下，一擺無著知嗄走到吾阿公阿嬤个間項眠帳肚囥，掩久實在熱到會死，還無結煞吔就將眠帳一掀起來，頭那探出來卧看哪!阿姆哀哪~好死毋死仰看著眠帳頂項个大樑頂高，排等兩副紅籮花色个棺材在該跡，人黏時像看著鬼驚一下續等大聲噭，目汁瀾泔衝出來圓身還zunˊ到會死，心肝頭還砰砰跳無停。
這種情形連續幾下暗晡，睡目都發青暝噭醒還犁尿，吾阿爸高不將就去同棺材神講：「求棺材神莫搞弄嚇自家个細孫女仔哪！」還渡去分神明收驚食符水。經過了這件事，心肝肚難免就狐疑緊問吾阿爸阿姆：「做麼个阿公阿嬤个間肚有放棺材？」，吾爸回講：「戇細妹仔啊！『棺材』、『官財』係吉祥个東西。『大家都會死忒妳毋使驚啦！』在講該係若嬤个嫁妝！」「若阿嬤个外家頭斯老庄徐屋係好額人，合『棺材』做嫁粧，係頭擺好額人个風俗，因爭好額人盡惜自家个妹仔，阿嬤又係屘女仔爺哀特別惜，爺哀希望自家个妹仔一生人『富貴好命』『公婆長壽年』个意思；乜還有一息展『好額人身分』啦！」
這滿詳細同其愐想起來，可能斷真有影哦，『棺材』、『官財』，吾阿公摎阿嬷食到盡長命，兩儕比比都恁長命食到八、九十歲正過身去咧哩，全部大細都家庭圓滿哩。摎大家分享!
祝福大家`
´♥(¯`´♥.¸________ღ☆ღ_________ ¸.♥´´¯)♥´´¯)
☆ ▓▒░☆ 開心滿點，心想事成 ☆░▒▓ ☆
(_¸.♥(_¸.♥´´ ¯¯¯¯¯¯¯¯ღ☆ღ¯¯¯¯¯¯¯¯¯ `´♥.¸_
留言列表
