jane3765529的部落格

在頭擺『認真讀書正有好前途』，係一句影響ngaiˇ盡大个話。
還細時節，歇在埔姜林客家莊下，該位風景靚，民俗單純，細人仔盡暢樂。ngaiˇ盡好同細人仔伴滿哪仔野上野下，毋係禾埕走相逐，就係草竇肚捉揚尾仔、灌土狗仔，阿無就在河壩肚搞水、覓田螺；總講就無蓋愛讀書，學校成績正普普仔定定。

阿姆盡愁慮驚ngaiˇ變壞，輒輒罵ngaiˇ：「細妺仔繳你讀書毋讀書，曬著一身烏刻刻仔，將來尋毋著穩定个頭路，嫁毋出去仰結煞？」
又講：「讀書毋讀⋯⋯書，毋當畜條豬」!「毋好像若爸若姆淨知耕田做事，逐日做到兩頭烏，看天食飯又絡無食哩！」佢牽聲打渧大聲个交代，到這下ngaiˇ還分分明明、清清楚楚在吾个耳公脣回響。

等到ngaiˇ較大兜仔，就立志煞猛讀書，聽先生个話，『認真』去學做人學『做事』，堵著困難个時節，乜會嚙等牙根認真愐想，也輒常同人請教。故所，到今行吔半世紀來，一直感覺著：【自家一路哩來就有用『讀書』人个研究精神，煞猛學習，毋敢攉忒阿姆个好金言】。

到這下ngaiˇ有受到家庭个栽培，讀到高等教育，有知識、學問、有分辨能力，有較穩定个收入，做得維持家庭生活鬆融。故所盡承蒙吾爸摎吾姆恁罵ngaiˇ、教ngaiˇ，分ngaiˇ知得做人「愛煞猛讀書，正有好前途」个道理。

到這電子時代係講再將『好前途』个範圍放還較闊兜，在360行各行各業其中，專心投入認真打拼，乜能夠『行行出狀元』哩!總愛煞猛、毋驚困難、肯食苦、能創新，就定著有好前途，你講係毋係嗬？
摎大家分享!祝福大家

`´♥(¯`´♥.¸________ღ☆ღ_________ ¸.♥´´¯)♥´´¯)
☆ ▓▒░☆ 開心滿點，心想事成 ☆░▒▓ ☆
(_¸.♥(_¸.♥´´ ¯¯¯¯¯¯¯¯ღ☆ღ¯¯¯¯¯¯¯¯¯ `´♥.¸_