jane3765529的部落格

祖孫情緣                       

在冬下時个臨晝邊吾公喊ngaiˇ兜deuˊ隻細凳仔，放門檻前分佢坐下來曬日頭花。該常節ngaiˇ歲數正7歲定，吾公厥歲數既經兼80歲吔，厥腳氣無好企毋久，ngaiˇ看到吾公个頭那頂高，纏等一條藍布巾，一儕人恬恬仔坐在門檻唇，日頭花晟在厥个圓身項反金，ngaiˇ伸手輕輕仔摸厥手感覺著燒暖燒暖哩，心肝肚愐想吾公毋知係愛做麼介嗬?伊仰目金金看等禾埕尾，盯著大路親像在等麼人一樣。

時間佢無聲無息一點點仔過去，吾公還係目絲絲仔盯等禾埕尾，實在等特久吔!畀伊測著還無奈何哪，還想睡一覺目伊連嗄伸幾下隻懶腰，寡打幾下隻『巴哈』〈哈欠〉，毋過伊老人家老罔老耳公還係儘靈通喲，旋風聽到禾埕尾有腳步聲，係吾爸摎吾姆作事轉來咧啦，吾公介皺皺強強會睡忒个目珠，一下黏時擘著金若na若仔喊吾姆个名，『阿菊阿菊吔!遽欸去拿『弓蕉乾』分ngaiˇ食欸哩啦!』，原來吾公係肚肌咧，一隻人尋無弓蕉乾囥奈位，正會在這跡位等大細轉來喲!!!

吾姆聽到就脫下厥手漯仔，爬上屋簷拿兩條曬到烏刻刻个弓蕉乾下來，送到吾公个面前分佢食，其實ngaiˇ看到介弓蕉乾既經曬到硬确确〈脫水變硬〉伸一滴甜味，吾公還放在厥無牙齒个牙框項糜啊糜仔，聽到伊『嗒阿嗒个聲音』還像盡享受哩!伊還斡頭笑瞇瞇摎ngaiˇ講『弓蕉乾』係台灣人个『人參果』哩喲，還拿一條分ngaiˇ食，講弓蕉營養最好乜係日本人个最愛。難怪吾公腦筋恁精〈聰明〉『曉食弓蕉乾當零嗒〈零食〉保養身體』。

摎大家分享。祝福大家

★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆(¯`*•.¸ . 好心情 幸運相隨. . ¸.•*´¯) ☆
★¸.•°*”˜˜”*°•.¸☆ ★ ☆¸.•°*”˜˜”*°•.¸★
☆´`•.¸¸.日日 開心 快樂 幸福 健康 ★.¸.

•´`

註解：民國六十一年中日斷交，台灣弓蕉滯銷，埔場〈弓蕉交易廣場〉像一座大山，歸日烏蠅轟天生蟲流湯，蕉農無奈損失嚴重，只好拿來曬『弓蕉乾』當零嗒〈零食〉食。根據日本人醫學研究講：【弓蕉含豐富个鐵質、鉀、膳食纖維、果寡糖，其中鐵質能刺激血液內个血色素有助保健。弓蕉所含豐富个鉀離子，對高血壓患者有輔助養生效果。所含大量个膳食纖維、果寡糖，有利腸道益菌生長，能刺激腸道蠕動改善便秘。維生素B群含量也盡高，幫助紓緩人體緊張】。